Vërtet, kur ngjitesh lart në platenë e ngushtë të minares para syve të jepet një pamje impozante ku shihet i tërë qyteti. Sido që të jetë, minarja e lartë e kësaj xhamie duket si e pazakonshme në zemrën e Oberscwaben-it, pra, në një zonë me tipare tipike katolike. Puna për ndërtimin e kësaj xhamie ka filluar tre vjet më parë, kryekëput nga donacionet e vetë muslimanëve të këtij qyteti.”
“Xhamia, për ne muslimanët që jetojmë në këtë qytet, është faktikisht si vendlindje”, thotë Xhevat Kaya, drejtuesi i këtij komuniteti të vogël prej 1500 muslimanësh. Për ndërtimin e xhamisë janë shpenzuar 2.5 milion euro. Numri më i madh i xhamive në Gjermani është nën kujdesin e Unionit Islam Turk për çështje fetare-DIB me seli në Ankara, i cili bën emërimin e kuadrove fetarë në këto xhami të cilët edhe i financon.
“Kur është fjala për Islamin, gjërat duhen parë me kujdes”, thotë Peter Ederer, shef i zyrës së emigracionit në Komunën e Ravensburgut, i cili për muslimanët në Schatzrnstrasse flet vetëm pozitivisht. Vizitorë të shpeshtë të kësaj xhamie janë kryetari i komunës, shefi i policisë si dhe ipeshkvi i qytetit.
“Ndërtimi i një xhamie është një shenjë pozitive që tregon për integrimin e muslimanëve në mesin tonë”,- vazhdon më tej Ederer, duke shtuar se “pakicat e tjera etnike e konsiderojnë Gjermaninë si vendin dhe atdheun e tyre... prandaj, kjo nuk duhet të kuptohet si ngritje e shoqërive paralele në Gjermani, për faktin se këtu ndërtohen minare dhe xhami, të cilat shpeshherë shihen me sy kritik! Ne me të huajt këtu duhet të punojmë për të zhvilluar e konsoliduar dialogun e jo t’i anashkalojmë ata, dhe kjo duhet të jetë deviza jonë. Ne nuk duhet të përqendrohemi vetëm në të metat e tyre, por duhet të shohim edhe dobitë që ata i sjellin shoqërisë sonë,” përfundon fjalën e tij Ederer.
Të njëjtën pikëpamje ka edhe z. Mustafa Ari, me profesion arkitekt, i cili thotë: “Muslimanët këtu nuk duhet të tërhiqen në vetvete, të izolohen, madje, të gjithë duhet ta përvetësojnë mirë gjuhën gjermane si dhe të kenë më shumë kontakte me njerëzit e rrethit ku jetojnë.”
S’ka dyshim se zhvillimet e fundit kanë ndikuar që edhe komuniteti musliman në Gjermani të ndjehet i shqetësuar për shkak të procedurave burokratike në marrjen e nënshtetësisë gjermane, për të mbërritur tek botimi i karikaturave fyese ndaj Profetit Muhamed (a.s.); e kështu me radhë, përfundon artikulli.
Xhamitë në Gjermani
Që nga viti 1990, numri i xhamive në Gjermani është rritur ndjeshëm. Koha e ndërtimit të tyre ilegal në periferi të qyteteve dhe zona industriale po merr fund, sepse në vend të tyre po ngrihen xhami të reja dhe mjaft tërheqëse. Sot, në tërë Gjermaninë numërohen mbi 141 xhami (me minare). Po ashtu, një numër i madh i tyre është në përfundim e sipër, ndërsa në Landin e Baden Warttembergut viteve të fundit janë ndërtuar këto xhami: në Pforzheim në vitin 1992, në Mannheim në vitin 1995, në Reutlingen në vitin 1996, në Sindelfingen në vitin 1998, në Konstanz në vitin 2000. Xhamia më e madhe në Gjermani është ajo e Manheimit me mbi 100.000 vizitorë në vit.
Njëra nga xhamitë e planifikuara për t’u ndërtuar është edhe ajo në Munih, e cila aktualisht ballafaqohet me mosaprovimin e lejes së ndërtimit, ngaqë vetë këshilltari komunal Manuel Pretzl është kundër ndërtimit të saj në lagjen Gotzinger Platz të qytetit. Mbase problem tjetër ka paraqitur plani arkitekturor i saj ndaj të cilit këshilli komunal ka dhënë vërejtjet e tij. Kështu që më në fund është aprovuar projekt-plani i arkitektit Walter Hofler, një plan-maket i xhamisë me dy minare me lartësi prej 41 metrash secila, me zyra dhe lokale përcjellëse për nevojat e besimtarëve. Mirëpo, problemi kryesor thotë z. Pretzl, qëndron tek pakënaqësia e banorëve për ndërtimin e saj, për faktin se kanë frikë se mos pas 20 viteve nga këto minare thirret ezani nga myezini i xhamisë... Një gjë e tillë thotë ai është e pamundur, sepse minaret nuk kanë platformë (rrathët) mbi të cilët mund të qëndrojë myezini!? Siç shihet edhe në foto, që të dy minaret janë pa rrathë sikundër ato ndërtohen zakonisht. Fillimi i ndërtimit të saj planifikohet të nisë në vitin 2008.

                                                                            [2006] RiniaIslame.com